সূৰ্য উদয় যদি লক্ষ্য আমাৰ
সূৰ্যাস্তৰ পিনে ধাৱমান কিয় ?
শীতল বৃষ্টি যদি কাম্য আমাৰ
অনাবৃষ্টি খেদি ফুৰিছোঁ কিয় ?
কেতিয়াবা দেউতাৰ চকু দুটা পোৰে
বুঢ়ী আয়ে নিজৰে চকুপানী পিয়ে
দেশৰ ৰাইখনে প্ৰাপ্য বিচাৰি
নিজৰে ডিঙি পাতি দিয়ে।
ভাবিছিলোঁ কিবা, পিছে হʼলগৈ কিবা
অঙ্কটো নিমিলা হʼল ।
সমৃদ্ধি সপোন ভাগি ছিগি
পৃথিৱী নিমাতী হʼল এʼ আই
পৃথিৱী নিমাতী হʼল ।
সমাজ ঘড়ী আজি থমকিছে কিয় ?
অনাবৃষ্টি খেদি ফুৰিছোঁনো কিয় ?
সূৰ্য উদয় যদি লক্ষ্য আমাৰ
সূৰ্যাস্তৰ পিনে ধাৱমান কিয় ?
শীতল বৃষ্টি যদি কাম্য আমাৰ
অনাবৃষ্টি খেদি ফুৰিছোঁ কিয় ?
সংজ্ঞা বিহীন শান্তিৰ ভাৱনা
পুৰণি গুহাত লুকায়
অৱচেতনাৰ আৰ্তনাদেৰে
নিজকে নিজেই ঘপিয়ায় ।
বহুদিন হʼল--খৰাং বতৰ
ক্ষয় চিহ্নিত ভালপোৱা
বড়গছ শিপা আৰু কঠিয়া তলিত
তেজ ঢালিবলৈ যোৱা ।
খাৰ ঢালিবলৈ যোৱা
হওক কলিজাৰ তেজবোৰ
কাজল কাজল মেঘ
মৃত ভাইটিৰ চকু কৃষ্ণচূড়া
মৃত ভাইটিৰ চকু কৃষ্ণচূড়া
ব্যক্তি গোষ্ঠী মিলি বোৱাওঁ আহা
শান্তিৰ শীতল নিজৰা
আৰু সময় নষ্ট কৰোঁ কিয় ?
সূৰ্য উদয় যদি লক্ষ্য আমাৰ
সূৰ্যাস্তৰ পিনে ধাবমান কিয় ?
Hits: 2276